Hollywood singer Katy Perry AI ka shikaar ho gayi hain. Unke is Deepfake photos ko Met Gala 2024 ka look diya gaya hai. Katy ki is Deepfake photo ko dekhkar unki maa bhi iske jhaase mein aa gayi hain.

Met Gala 2024 event subah se hi shuru ho chuka hai. Bollywood se lekar Hollywood ki tamam hastiyon ne is event mein fashion ka tadka lagaya. Kai abhinetriyan is event mein apni filmon ki shooting ki wajah se shamil nahi ho paayi hain, jinmein Deepika Padukone, Priyanka Chopra ke alawa Katy Perry ka naam bhi shamil hai. Lekin AI ki madad se kisi ne Katy Perry ka deepfake photo banaya hai aur is photo ko Gala ke event ki jhalak di gayi hai.

Deepfake ka shikaar ho chuke stars

Abhitak South se lekar Bollywood aur Hollywood tak ke kai sitare artificial intelligence AI ke deepfake ka shikaar ho chuke hain. Jismein chehra kisi aur ka hota hai aur body kisi aur ki. In tasviron ko dekhkar asli aur nakli mein fark karna bhi mushkil ho jaata hai. Aamir Khan, Alia Bhatt se lekar ab Katy Perry ki photos ko AI ke deepfake tool ki madad se edit karke khoob share kiya ja raha hai. Jabki Katy Perry is saal fashion event mein shamil hi nahi hui hain.

Katy Perry ka deepfake photo

Katy Perry ki AI photos social media par jamkar viral ho rahi hain. Jabki Katy is saal Met Gala 2024 mein shamil nahi hui hain, lekin red carpet se unki photo jamkar viral ho rahi hai, jo dekhne mein ekdam asli dikh rahi hai. Unhone social media par is baat ki jaankari dete hue apne fans ko sawdhan bhi kiya hai.

Katy ki maa hui deepfake photo ka shikaar

Katy Perry ki maa unke is AI look ka shikaar ho gayin aur Katy ko social media par message bhi kar diya. Katy ki maa ne likha, ”Mujhe nahi pata tha ki tum Gala mein jaogi. Kya shandar gown pehna hua hai. Tum bilkul gulab jaisi dikh rahi ho.” Katy ki maa ke is comment ke baad Katy ne apni maa ko reply kiya aur likha, ”Mom aap bhi AI ke jhase mein aa gayi ho, sambhal kar. Main Met Gala event par nahi ja paayi, kaam karna hai mujhe.”

Met Gala ki theme ‘The Garden of Time’ rakhi gayi thi. Is event mein sabhi hastiyon ne fashion ka jalwa bakhubi bikhraaya. Jandaya se lekar Jennifer Lopez, Alia Bhatt ke alawa bhi Hollywood ki tamam naamchin hastiyon ne Met Gala mein apne fashion ka jalwa dikhaya.